PRIAMBUL
Bazeia ba artigo 53º Estatuto Orgânico do Conselho dos Combatentes da Libertação Nacional-CCLN mak ami nain 5 (lima) membro Comissão Instaladora simu knaar husi Governu iha dia 13 de Março 2019 liu husi SE. Secretário de Estado & Ministro em-Exercício dos Combatentes da Libertação Nacional. Ami nain lima reprezenta região lima Rezisténsia Nasional nian ho knaar atu halaó preprarativos hotu hotu hodi realiza Congresso Nacional, harí Conselho dos Combatentes da Libertação Nacional no asegura prosesu transferênsia knaar husi Comissão de Homenagem, Supervisão do Registo e Recurso – CHSRR ba CCLN.
Knaar neébe ami nain lima simu husi Governu liu husi Decreto-Lei No.7/2018, 28 de Março de 2019, ami reflete kleán hanesan mos knaar hirak neébe kuadros Rezisténsia Nasionál nian simu husi desizaun Konferénsia Nasional iha Março 1981 iha Maubai/Bibileo/Viqueque, ba reorganizasaun País nian husi Frente hotu hotu no husi komponente hotu hotu ba prosesu luta Libertasaun Nasional nian.
Tamba neé, bazeia ba mandatu husi Decreto-Lei neé, mak ami nain lima ho ekipa sekretariadu halo koordenasaun ho partes relevantes hotu hotu, gradualmente harí ona Conselho Municipais dos Combatentes da Libertação Nacional – CMCLN iha kada munisipiu iha territóriu nasionál husi Setembro too Novembro 2019 no harí ona Conselho dos Combatentes da Libertação Nacional – CCLN liu husi Primeiru Kongresu Nasional iha 18-21 Dezembro 2019 iha Centro Convensão Díli.
Liu tiha estrutura Conselho dos Combatentes estabelese husi Nasional too Munisípios, mak hahú husi Janeiro 2020 Comissão Instaladora ho CCLN laó hamutuk hodi kooderna no halo preparasaun ba Plano Estratégico, Plano Acção Anual, ho ninia orsamentu no realiza Primeira Assembleia Geral iha dia 18, 19, 20 Novembro 2020 iha Salão Auditório Quartel Geral F-FDTL Fatuhada hodi diskuite no aprova ho Rekomendasaun lubuk ida ba Governu. Hafoin kontinua halo koordenasaun ba prosesu transição função husi CHSRR ba CCLN no aktividades atendimentu sira seluk ba ita nia kombatentes no veteranos ho sira nia oan sira.
No hahú husi loron CCLN simu knaar husi Comissão de Homenagem, Supervisão do Registo e Recursos (CHSRR), iha loron neé kedas Comissão Instaladora nia misaun mos remata tuir artigo 53º Decreto-Lei Nº7/2018, 28 de Março. Ho transferénsia knaar neé, iha lron 9 / 07 / 2021 CCLN hahú simu knaar todan ida atu halaó hodi hatutan servisu hotu hotu neébe Comissão Homenagem halaó ona durante tinan 14 (sanolu resin hát) neé, ho objetivu atu trata buat ne’ebe iha ligasaun ho assuntos veteranos ho ninia jerasaun, no vida nasaun nian ne’ebe hatu’ur ona iha artigo 5º ho 6º Decreto Lei Nᵒ 7/2018 de 28 de Março, ho ninia rezumo tuir mai :
- Halo promosaun ba defeza direitu no dever kombatentes sira nian;
- Halo promosaun ba dezenvolvimentu nasional sustentável ba paz no estabilidade sosiál nasaun nian;
- Halo promosaun no honra ba memória Rezistênsia Timor oan sira nian;
- Halo promosaun ba prestíziu, naran diak no reputasaun Kombatentes sira nian;
- Halo promosaun ba valores rezistênsia no luta ba hametin independênsia nasional hamutuk ho jerasaun foun sira;
- Hanesan entidade konsulta governu nian iha ninia atuasaun hotu hotu relasiona ho seguransa no defeza nasionál;
- Halaó knar estadu nian neébe atribui husi autoridade sira.
Pontos hirak ne’e mak nu’udar CCLN nia missão ne’ebe formula ona iha programa ho plano estratégiku atu halaó gradualmente iha kada periudu governasaun nian.
Atu hateten mos katak, iha Primeira Parte Relatóriu neé nian, ami aprezenta mos rezumu badak husi Konferénsia Nasionál Maubai nian, hanesan dados no mos inspirasaun ba ita hotu iha ita ida idak nia knaar ba futuru.
Ikus liu ho orgulho ami hakarak fó agradesimentu ba Governu ne’ebe fó ona konfiansa ba ami nain lima hodi hala’o missão todan ne’e too remata. Agradese mos ba Naí autoridades militar ho sivil, autoridades seguransa (PNTL) liu liu autoridades munisipais ho kombatentes hotu hotu libertasaun nasional nian; Ba maun boot líderes nasionaís, estrutura Kúpula Regiões too Nurep, Geração Patriotas, Organização Feto, Juventude ho Associações sira hotu; agradese ba Sua Excelênsia Secretário de Estado ho Ministro dos Combatentes da Libertação Nacional no ekipa preparasaun hotu hotu ne’ebe fó apoiu ba ami nia knar todan ne’e, liu liu fó agradese ba Naí Maromak ho heróis nasionais, neébe tulun no akompanha ami isin diak nafatin durante halaó aktividades iha munisípiu hotu hotu iha territóriu nasional too remata.
Obrigadu waín.